កុំជុះតាមដំរី! អ្នកគ្មានបទពិសោធន៍ កុំប្រថុយចងការធនាគារយកមករកស៊ីរបរទាំង៥ ប្រភេទនេះឱ្យសោះ

 ការជ្រើសរើសមុខរបរយកមករកស៊ីពិតជាសំខាន់ខ្លាំងណាស់ ប្រសិនជាអ្នកគ្មានបទពិសោធន៍ ហើយឃើញគេរកស៊ីជោគជ័យហ៊ានហក់លោតទៅខ្ចីលុយធនាគារយកមកធ្វើរបរតាមគេនោះនឹងធ្វើឱ្យទាំងអស់គ្នាអាចប្រឈមមុខជាមួយការជំពាក់លុយធនាគារ ក៏ដូចជាខាតទាំងពេលវេលាផងដែរ។ ខាងក្រោមនេះជាមុខរបរ៥ ប្រភេទដែលអ្នកគ្មានបទពិសោធន៍ឬអ្នកទើបតែចេញរកស៊ីថ្មីថ្មោងពុំគួរទៅប្រថុយធ្វើឡើយ៖

    មុខរបរអ្នកមាន៖ លោក សំ កុសល បាននិយាយថាចំពោះគ្នាយើងដែលមិនធ្លាប់រកស៊ីសោះលោកមិនលើកទឹកចិត្តឱ្យទៅរកស៊ីរបររបស់អ្នកមានទេ ហើយចំពោះមុខរបរអ្នកមាននេះគឺមានដូចជាដំណាំចេក ដោយសារតែដំណាំចេកគឺយើងត្រូវការដីរាប់រយហិចតាដើម្បីដាំ សម្រាប់របរអ្នកមានមួយទៀតនោះគឺដំាំកៅស៊ូព្រោះដំណាំកៅស៊ូនេះទម្រាំតែវាបានហុចផលគឺត្រូវការពេលយូរណាស់ មួយវិញទៀតគឺដំណាំដូងក្រអូប ដែលជាប្រភេទដំណាំដែលបានផលយូរដូចគ្នា។ ដូច្នេះសម្រាប់បងប្អូនដែលទៅប្រថុយខ្ចីលុយគេមករកស៊ីរបរទាំងនេះគឺអាចមានហានិភ័យខ្ពស់ណាស់ ដោយសារតែទម្រាំតែដំណាំទាំងនេះហុចផលឱ្យយើងគឺយើងអាចនឹងអស់លុយពីខ្លួន គ្មានលុយសងធនាគារឡើយ។

មុខរបរសមុទ្រក្រហម៖ សម្រាប់របរសមុទ្រក្រហមគឺមានដូចជាតែគុជ បើកហាងកាហ្វេ ផលិតឬលក់ឡេ ដោយរបរទាំងនេះអ្នករកស៊ីថ្មីថ្មោងមិនគួរទៅលូកលាន់ឡើយ​ ព្រោះតែបច្ចុប្បន្នទីផ្សារស្រុកខ្មែរយើងមានគេធ្វើច្រើនណាស់ប៉ុន្តែប្រសិនជាអ្នកទាំងអស់គ្នាស្រលាញ់របរកាហ្វេ ឬតែគុជយើងអាចទៅទិញហ្រ្វេនឆាយពីយីហោណាដែលគេល្បីហើយគេលក់ដាច់ខ្លាំងនោះទើបយើងមិនងាយបរាជ័យ។ ចំណែករបរផលិតឬលក់ឡេវិញ លោកអ្នកដឹងហើយថាមានគ្នាយើងរកស៊ីច្រើនណាស់ហើយក៏មានអ្នកមួយចំនួនទៀតទើបតែបង្កើតប្រេនថ្មីៗទេតែបានដួលទៅវិញហើយ ដូច្នេះសម្រាប់របរឡេនេះបើចង់លក់យើងគួរតែរកចំណុចពិសេសនៃផលិតផលយើងឱ្យប្លែកពីគេ អស្ចារ្យជាងគេចាំរកស៊ី បើយើងផលិតឡើងធម្មតាៗដូចផលិតផលគេទេមិនគួរទៅប្រថុយខ្ចីលុយធនាគារមករកស៊ីជាដាច់ខាត។

      លក់គ្រឿងសំណង់៖ បច្ចេកវិទ្យាកាន់តែទំនើប ចំណែកមនុស្សក៏កាន់តែជឿនលឿនទៅតាមហ្នឹងដែរ ពីព្រោះនៅពេលដែលគេចង់ទិញគ្រឿងសំណង់គេអាចហ្នឹងលេងចង់ទៅទិញតាមផ្ទះលក់សំណង់តូចៗហើយ គេអាចនឹងទៅកន្លែងលក់គ្រឿងសំណង់ធំៗអីជាដើមព្រោះកន្លែងធំមានលក់សម្ភារៈច្រើនងាយស្រួលគេជ្រើសរើសតាមចិត្ត។ ម្យ៉ាងវិញនោះ ការបើកហាងលក់គ្រឿងសំណង់គឺចំណាយទុនច្រើនណាស់ ព្រោះយើងត្រូវទិញសម្ភារៈទិញយកមកស្តុកទុក ធ្វើស្លាកយីហោ បើកហាងដេគ័រឱ្យមានភាពទាក់ទាញ ពោលការបើកហាងលក់គ្រឿងសំណង់នីមួយៗចំណាយទុនមិនក្រោមម៉ឺនដុល្លារឡើយ ដូច្នេះសម្រាប់អ្នកមានដើមទុនតិច ប្រសិនជាចង់បើកហាងលក់គ្រឿងសំណង់គួរពិចារណាឱ្យបានម៉ត់ចត់ជៀសវាងខាតពេលវេលា និងខាតលុយទទេរៗ។

បើកការ៉ាស់សាំង៖ មែនទែនទៅ មុខរបរការ៉ាស់សាំងមិនមែនជាមុខរបរមិនល្អឡើយ គ្រាន់តែថាបច្ចុប្បន្ននេះមានមនុស្សរកស៊ីរបរនេះច្រើន មិនតែប៉ុណ្ណោះពេលនេះប្រទេសកម្ពុជាក៏មានប្រជាជនមួយចំនួនតូចចាប់ផ្តើមងាកមកប្រើប្រាស់ឡានអគ្គីសនីវិញម្តង ដែលជាហេតុនៅថ្ងៃអនាគតអាចធ្វើឱ្យការ៉ាស់សាំងមានហានិភ័យខ្ពស់ណាស់។

ឡានដឹកដី៖ ចំពោះ មុខរបរឡានដឹកដីនេះគឺយើងត្រូវចំណាយលុយខ្ទង់ម៉ឺនដុល្លារឯណោះសម្រាប់ទៅទិញឡានមួយ ចំណែកការទទួលបានផលចំណេញគឺតិចណាស់ ដូច្នេះសម្រាប់បងប្អូនដែលមានលុយតិចតួចចង់ចេញរកស៊ីមិនគួរចាប់របរនេះឡើយ ព្រោះមុខរបរនេះមានគេរកស៊ីយូរហើយ។ ឧទាហរណ៍៖ នៅពេលយើងមានលុយ ២ម៉ឺនដុល្លារចង់ចាប់របរឡានដឹកដីតែយើងនៅខ្វះដើមទុន ២ម៉ឺនដុល្លារទៀត យើងក៏រត់ទៅខ្ចីពីធនាគារ២ម៉ឺនដុល្លារបន្ថែម សរុបទុនយើងមាន៤ម៉ឺនដុល្លារ តែយើងត្រូវជួលបុគ្គលិកមកបើកឡានមួយខែៗនៅត្រូវដូរប្រេងបាតទៀត ងាកខូចងាកជួសជុលឡានដឹកដីរហូត ច្បាស់ណាស់យើងប្រាកដជាខាតហើយជំពាក់គេថែមទៀត ព្រោះតែយើងចាប់របរបុរាណមករកស៊ី។